ପଞ୍ଜାବରେ କ୍ଷମତାସୀନ ଅକାଳୀଦଳର ଏକ ସରପଞ୍ଚ ବିକ୍ଷୋଭ ପ୍ରଦର୍ଶନ କରୁଥିବା ଏକ ସ୍କୁଲ ଶିକ୍ଷୟିତ୍ରୀଙ୍କୁ ଚାପୁଡ଼ା ମାରିବା- ଗଣମାଧ୍ୟମରେ ବେଶ୍ ପ୍ରଚାରିତ ଓ ଚର୍ଚ୍ଚିତ ହେଉଛି । ଶରଦ ପାୱାରଙ୍କ ଗାଲରେ ଚାପୁଡ଼ା ବସିବା ଦେଖି ପ୍ରଣବ ମୁଖାର୍ଜୀ କ୍ଷୋଭୋକ୍ତି କରିଥିଲେ ଯେ, ‘ଭାରତରେ ଏ କ’ଣ ହେଉଛି?’ ସେହିଭଳି କ୍ଷୋଭକ୍ତି କିନ୍ତୁ ସରପଞ୍ଚ-ସ୍କୁଲ ଶିକ୍ଷୟିତ୍ରୀ ଘଟଣା ପରେ ଶୁଣିବାକୁ ମିଳିଲା ନାହିଁ । କାହିଁକି? ତାଙ୍କ ଶ୍ରେଣୀ (ରାଜନୈତିକ ଶ୍ରେଣୀ)ର କୌଣସି ଲୋକର ଗାଲରେ ତ ଚାପୁଡ଼ା ବସୁନାହିଁ! ବରଂ ତାଙ୍କ ଶ୍ରେଣୀର ଲୋକଟିଏ ସାଧାରଣ ଲୋକ ଗାଲରେ ଚାପୁଡ଼ା ବସାଉଛି । ଆନ୍ନାଙ୍କ ମୁହଁରୁ ମଧ୍ୟ ଏଯାବତ୍ ଏହି ଅଭଦ୍ରୋଚିତ ଘୃଣ୍ୟ ଆଚରଣ ବିରୋଧରେ ପଦୁଟିଏ ଶୁଣିବାକୁ ମିଳିଲା ନାହିଁ । କାହିଁକି ବା ଶୁଭନ୍ତା- ଶରଦ ପାୱାରଙ୍କ ସହ ତାଙ୍କର ଯେପରି ବିଦ୍ୱେଷ, ସେପରି ବିଦ୍ୱେଷ ତ ସେହି ଅକାଳୀ ନେତାଙ୍କ ବିରୋଧରେ ଆନ୍ନାଙ୍କର ନାହିଁ । -ଶୁଦ୍ରକ
